សហរដ្ឋអាមេរិក ៖ អតីតកីឡាកាស Shad Gaspard ដែលបានបាត់ខ្លួននៅឆ្នេរសមុទ្រក្នុងទីក្រុង Los Angeles រដ្ឋ California ត្រូវបានបញ្ជាក់ថា បាត់បង់ជីវិតហើយនៅវ័យ៣៩ឆ្នាំ ។ គួររំលឹកថា អតីតកីឡាកាសម្នាក់បាត់ខ្លួន ក្រោយចុះទៅជួយកូនលង់ទឹកសមុទ្រ
បើយោងតាមសម្តីពីមន្ត្រីប៉ូលីសក្នុងទីក្រុង Los Angeles បាននិយាយថា សពមនុស្សម្នាក់ដែលត្រូវបានរកឃើញកាលពីថ្ងៃពុធ ទី២០ នៅលើឆ្នេរសមុទ្រ Venice ត្រូវបានបញ្ជាក់ថា គឺជាលោក Shad Gaspard ដែលជាអតីតកីឡាកាសរបស់ស្ថាប័ន WWE ដែលត្រូវរលកទឹកសមុទ្របោកបក់យកទៅបាត់កាលពីថ្ងៃអាទិត្យ ទី១៧ ខែឧសភា កន្លងទៅ នៅពេលលោកព្យាយាមហែលទៅជួយកូនប្រុសរបស់ខ្លួន ដែលកំពុងលង់ទឹកសមុទ្រ ។
សូមបញ្ជាក់ថា នៅក្នុងហេតុការណ៍កាលពីថ្ងៃអាទិត្យនោះកូនប្រុសវ័យ ១០ ឆ្នាំរបស់ Shad Gaspard ដែលមានឈ្មោះថា Aryeh ត្រូវបានក្រុមឆ្មាំការពារសមុទ្រជួយសង្គ្រោះឡើងមកលើគោកដោយសុវត្តិភាព ។
សូមបញ្ជាក់ថា លោក Shad Gaspard ទទួលបានភាពលេចធ្លោខ្លាំងនៅ WWE ជាមួយក្រុមឈ្មោះថា Cryme Time រួមនឹងដៃគូរបស់គេគឺ JTG ។ បន្ទាប់ពីចូលនិវត្តន៍ពី WWE ក្នុងឆ្នាំ ២០១០ Gaspard មានវត្តមានលើកម្មវិធីទូរទស្សន៍ និងខ្សែភាពយន្តមួយចំនួន ។ មុនពេលចាប់អាជីពជាអ្នកកីឡាកាស Gaspard ក៏ធ្លាប់បានធ្វើការជាកងអង្គរក្សការពារឲ្យតារាចម្រៀង Britney Spears និងអ្នកប្រដាល់ Mike Tyson ផងដែរ ៕ (ដកស្រង់ចេញពី theguardian)
