ខេត្តស្ទឹងត្រែង ៖ មន្ត្រីរដ្ឋបាលជលផលខេត្តស្ទឹងត្រែង សហការជាមួយ កម្លាំងនគរបាលស្រុកថាឡាបរិវ៉ាត់ និងសហគមន៍នេសាទ បានចុះបង្ក្រាបទូកនេសាទខុសច្បាប់ ចំនួន២គ្រឿង របស់ជនជាតិវៀតណាម និងបានដកហូតត្រីត្រសក់មួយក្បាល មានទម្ងន់១២គីឡូក្រាម កាលយប់ថ្ងៃទី៣ ខែធ្នូ ឆ្នាំ២០២០ ។
លោក ទុំ នីរ៉ូ នាយខណ្ឌរដ្ឋបាលជលផលខេត្តស្ទឹងត្រែង បានប្រាប់នៅព្រឹកថ្ងៃទី៤ ខែធ្នូ ឆ្នាំ២០២០ អោយដឹងថា ករណីបង្ក្រាបបទល្មើសនេសាទនោះ សមត្ថកិច្ចជលផលស្ទឹងត្រែង ដោយមានការសហការពីអធិការដ្ឋាននគរបាលស្រុកថាឡាបរិវ៉ាត់ និងសហគមន៍នេសាទភូមិវាលខ្សាច់ បានចុះបង្ក្រាបទូកនេសាទរបស់ក្រុមនេសាទវៀតណាមចំនួន ២គ្រឿង ដែលប្រើ មងបណ្តែតក្រឡាធំ និងវែង នៅជិតស្ពានមេគង្គ ក្នុងសង្កាត់ព្រះបាទ ។
ក្រៅពីបង្ក្រាប សមត្ថកិច្ចក៏បានដកហូត ទូកឌុកឈើចំនួន ២ គ្រឿង, ម៉ាស៊ីនម៉ាកហុងដា ១៣សេស ១គ្រឿង និងម៉ាកហីនូតា ១៨សេស ១គ្រឿង, មងនីឡុងបណ្តែត ២ត្បូង ប្រវែង១,០០០ ម៉ែត្រ ជម្រៅ៧ម៉ែត្រ ក្រឡា២០សង់ទីម៉ែត្រ និងក្រឡា ២៥សង់ទីម៉ែត្រ និងត្រីត្រសក់ ១ក្បាល ទំងន់ ១២គីឡូក្រាម ។
បន្ទាប់ពីបានពិនិត្យជាក់ស្តែង សមត្ថកិច្ចបានសម្រេចដកហូតទុកនូវមងក្រឡាធំទាំងពីរ និងផាកពិន័យចំនួន ៥លានរៀល ចំណែកឯទូកទាំងពីរគ្រឿង បានប្រគល់ឱ្យម្ចាស់វិញ ផងដែរ ។
យ៉ាងពា ប្រសិនបើ មន្ត្រីជំនាញរកឃើញល្មើស ជាលើកទី២ នឹងកសាងសំណុំរឿងបញ្ចូនទៅតុលាការ ៕
