ខេត្តក្រចេះ ៖ ជនសង្ស័យម្នាក់ ត្រូវបានកម្លាំងនគរបាលព្រហ្មទណ្ឌស្រុកស្នួល ចាប់ឃាត់ខ្លួន បន្ទាប់ពីស្រាវជ្រាវដឹងថា ជនសង្ស័យរូបនេះ ជាជនដៃដល់ ក្នុងអំពើឃាតកម្មកាប់សម្លាប់បងថ្លៃជីដូនមួយ រួចដុតកម្ទេចសាកសពចោល ជាមួយនឹងម៉ូតូ១គ្រឿង នៅក្នុងចម្ការកៅស៊ូមួយកន្លែង កាលពីឆ្នាំ២០១៩ កន្លងទៅ ។
ជនដៃដល់ឈ្មោះ បូ ណារិន ហៅធី អាយុ២៣ឆ្នាំ រស់នៅឃុំស្រចារ ស្រុកស្នួល និងត្រូវបាននគរបាលស្រុកស្នួល ដឹកនាំដោយលោកវរសេនីយ៍ឯក ចាន់ សុខគីម អធិការនគរ បាលស្រុកស្រាវជ្រាវចាប់ខ្លួនបាននៅថ្ងៃទី៨ ខែធ្នូ ក្រោយធ្វើសកម្មភាពមានរយះពេលជាង១ឆ្នាំ។ មូលហេតុដោយសារខឹងជនរងគ្រោះជំពាក់លុយចំនួនន១០ម៉ឺនរៀលតែមិនព្រមសងវិញ។
ជនសង្ស័យដៃដល់បានឆ្លើយសារភាពថា កាលពីខែមិថុនា ឆ្នាំ២០១៩ រូបគេពិតជាបានធ្វើសកម្មភាពកាប់សម្លាប់ទៅលើជនរងគ្រោះដែលត្រូវជាបងថ្លៃជីដូនមួយ រួចបានដុតកម្ទេចសាកសពជាមួយនិងម៉ូតូមួយគ្រឿង នៅក្នុងព្រៃចម្ការកៅស៊ូ ដោយសារមូលហេតុខឹងជនរងគ្រោះជំពាក់លុយចំនួនន១០ម៉ឺនរៀលតែមិនព្រមសងវិញ។
លោកអធិការបញ្ជាក់ថា ជនសង្ស័យក្រោយធ្វើសកម្មភាពរួចបានគេចខ្លួនមួយរយះពេល។ តែក្រោយការស្រាវជ្រាវយ៉ាងហ្មតចតពីននគរបាលជំនាញព្រហ្មទណ្ឌស្រុក ទើបកម្លាំងជំនាញកំណត់មុខសញ្ញាបាន និងឈានដល់ការចាប់ខ្លួនជននម្នាក់នេះ តែម្តង ។
សូមរម្លឹកឡើងវិញថា ឃាតកម្មដ៏សាហាវយង់ឃ្នងមួយ ដោយប្រជពលរដ្ឋបានប្រទះឃើញសពបុរសម្នាក់ ខ្លោចរួញក្រញ៉ង និងខ្មោចម៉ូតូ១គ្រឿង ត្រូវបានគេដុតសម្លាប់ក្នុងភ្នក់ភ្លើង កាលពីវេលាម៉ោង១២ថ្ងៃត្រង់ ថ្ងៃទី២៦ មិថុនា ២០១៩ ចំណុចដីឡូតិ៍កៅស៊ូចម្ងាយពីផ្លូវលំ ប្រមាណជា១០០ម៉ែត្រ ត្រង់ចំណុចផ្លូវកាំភ្លើងធំ ក្នុងឡូតិ៍ចម្ការកៅស៊ូក្រុមហ៊ុនស្នួល ភូមិដូនប៉ុក ឃុំស្រែចារ ស្រុកស្នួល ខេត្តក្រចេះ ។
ជនរងគ្រោះ ដែលត្រូវគេដុតសម្លាប់យ៉ាងព្រៃផ្សៃនេះ មានឈ្មោះ ខុម សិទ្ធ ភេទប្រុស អាយុ២៣ឆ្នាំ ជនជាតិខ្មែរ រស់នៅភូមិដូនប៉ុក ឃុំស្រែចារ ស្រុកស្នួល ខេត្តក្រចេះ (កន្លងមកធ្លាប់បានប្រើប្រាស់សារធាតុញៀន) ។
បើតាមសម្តីលោកយាយរបស់យុវជនរងគ្រោះ បានឲ្យដឹងថា មុនពេលកើតហេតុ កាលពីវេលាម៉ោង១០ព្រឹក ចៅប្រុសរូបនេះបានសុំលុយគាត់ ចំនួន២០០០រៀល ដើម្បីចូលទៅកាប់អុសក្នុងចម្ការកៅស៊ូ បន្ទាប់ពីគាត់ឲ្យលុយហើយ ចៅប្រុសរូបនេះបានជិះម៉ូតូ១គ្រឿង ម៉ាកសង់ការ៉េ ពណ៌ក្រហម គ្មានស្លាកលេខ និងកាំបិតផ្គាក់ ចេញទៅតែម្នាក់ឯងបាត់ទៅ ។
យាយយុវជនរងគ្រោះ បានបន្តថា លុះដល់វេលាកើតហេតុ ម៉ោង១២នាទីរសៀល ស្រាប់តែមានកម្មករជៀរជ័រកៅស៊ូម្នាក់ ប្រទះឃើញសាកសពចៅប្រុសរបស់គាត់ឆេះស្លាប់នៅក្បែរម៉ូតូ ខ្លោចរួញក្រញ៉ង់ មើលលែងស្គាល់ទៅហើយ ក៏បានរាយការណ៍ប្រាប់សមត្ថកិច្ច ។
យាយយុវជនរងគ្រោះ បានបន្ថែមថា ក្រោពីទទួលបានពាក្យបណ្តឹង កម្លាំងសមត្ថកិច្ចបានចុះទៅដល់កន្លែងកើតហេតុ ធ្វើការហ៊ុមព័ទ្ធ និងបានហៅគាត់ទៅពិនិត្យសាកសព ទើបដឹងថា ជាចៅប្រុសរបស់គាត់ ។
កាលនោះ កម្លាំងសមត្ថកិច្ចជំនាញ បានធ្វើកោសល្យវិច័យនិងពិនិត្យសាកសព ឃើញមានស្រាបៀរចំនួន៣កំប៉ុង ប្រអប់ស្នោរចំនួន១ ក្រៅពីនោះពុំមានអ្វីគួរកត់សម្គាល់ទេ ។ បន្ទាប់មក សមត្ថកិច្ចជំនាញធ្វើការស្រាវជ្រាវ រហូតចាប់ខ្លួនបាននៅថ្ងៃទី៨ ខែធ្នូ ឆ្នាំ២០២០ ក្រោយគេចខ្លួនជាង១ឆ្នាំ ៕
