CPP ដំឡើងតំណែងកូនប្រុសច្បងលោក ហ៊ុន សែន ជាអនុប្រធានគណៈចលនាមហាជន

លោក ហ៊ុន ម៉ា​ណែ​ត ដែល​គេ​ស្គាល់​ថា​ជា​កូនប្រុស​ច្បង​របស់​លោក ហ៊ុន សែន ប្រធាន​គណបក្ស​ប្រជាជន​កម្ពុជា ត្រូវ​បាន​ដំឡើង​តំណែង​ជា​អនុប្រធាន​គណៈ​ចលនា​មហាជន​នៃ​គណៈកម្មាធិការ​កណ្តាល​គណបក្ស​ប្រជាជន​កម្ពុជា ។​

​នេះ​បើ​យោង​តាម​សេចក្តីសម្រេច​ស្តី​ពី​ការ​តែងតាំង​ដំឡើង​មន្ត្រី​គណបក្ស​ដែល​ចុះហត្ថលេខា​ដោយ​លោក សាយ ឈុំ អនុប្រធាន​គណបក្ស​ប្រជាជន​កម្ពុជា​កាលពី​ថ្ងៃ​ទី​២៣ ធ្នូ ២០២០ ។​

​កាលពី​ថ្ងៃ​ទី​១៣ មិថុនា ២០២០ ក៍​ត្រូវ​បាន​គណបក្ស​ប្រជាជន​កម្ពុជា ប្រកាស​តែងតាំង​ជា​ប្រធាន​យុវជន​គណបក្ស​ប្រជាជន​កម្ពុជា​ថ្នាក់​កណ្តាល ។​

​ក្រៅពី​កាន់​តួនាទី​ខាងលើ លោក ហ៊ុន ម៉ា​ណែ​ត ជា​សមាជិក​អចិន្ត្រៃយ៍​នៃ​គណបក្ស​ប្រជាជន​កម្ពុជា ។

ចំណែក​ក្នុង​ជួរ​រាជរដ្ឋាភិបាល​ដែល​ដឹកនាំ​ដោយ​ឪពុក​របស់​លោក​  លោក ហ៊ុន ម៉ា​ណែ​ត បច្ចុប្បន្ន​មាន​តួនាទី​ជា​អគ្គមេបញ្ជាការ​រង​កង​យោធពលខេមរភូមិន្ទ និង​ជា​មេបញ្ជាការ​កងទ័ពជើងគោក​ផង​ដែរ​៕