អភិបាលនៃគណៈអភិបាលរាជធានីភ្នំពេញ លោក ឃួង ស្រេង បានព្រមានដកប្រធានផ្សារណាដែលអនុញ្ញាតឲ្យមានការលេងល្បែងភ្នាល់ ពិសេសកត់កន្ទុយលេខក្នុងផ្សារ ។
បើតាមលោក ឃួង ស្រេង ទោះជាប្រធានផ្សារមានខ្សែធំប៉ុនណាក៍ដោយ ក៍ត្រូវអនុវត្តន៍អភិក្រមទី៥របស់លោក ហ៊ុន សែន គឺ«វះកាត់» ដកចោលដែរ ឲ្យតែប្រព្រឹត្តអំពើពុករលួយ កាងពួកលេងល្បែងនិងពួកគ្រឿងញៀន ។
នេះបើតាម លោក ឯក ឃុនឌឿន អភិបាលនៃគណៈអភិបាលខណ្ឌទួលគោក ដែលបញ្ជាក់ប្រាប់សមត្ថកិច្ចមូលដ្ឋានអំឡុងពេលលោកបានដឹកនាំកម្លាំងចុះបង្ក្រាបទីតាំងលេងល្បែងស៊ីសងនៅក្នុងផ្ទះលេខ៦៤ ផ្លូវលេខ១៨៦ កែងនឹងផ្លូវលេខ២៥៧ សង្កាត់ទឹកល្អក់ទី៣ ខណ្ឌទួលគោក កាលពីរសៀលថ្ងៃទី២៣ ធ្នូ ២០២០ ។
ជាការកត់សម្គាល់ នៅក្នុងផ្សារមួយចំនួនក្នុងរាជធានីភ្នំពេញ គេតែងឃើញមានការលេងល្បែងស៊ីសង ពិសេសការកត់កន្ទុយលេខ ដោយមិនមានមន្ត្រីណាចុះរារាំងឃាត់ ឬបិទនោះទេ ដោយសារតែមន្ត្រីអាជ្ញាធរមួយចំនួន ត្រូវបានអ្នកកត់កន្ទុយលេខ ក៍ដូចជាពលរដ្ឋខ្លះថា មន្ត្រីមូលដ្ឋានទទួលបានលុយបង់ប្រចាំខែ ។
យ៉ាងណា រង់ចាំតាមដានទាំងអស់គ្នា ថាតើបទបញ្ជា ឬ ការព្រមានរបស់លោក ឃួង ស្រេង ខាងលើ មានប្រសិទ្ឋភាពកម្រិតណា ៕
