គិតត្រឹមម៉ោង១២និង៥៨នាទីថ្ងៃត្រង់ថ្ងៃទី៣០ ធ្នូ ២០២០នេះ សមត្ថកិច្ចនៅមិនទាន់ចាប់បានជនដៃដល់ដែលបាញ់សម្លាប់គូទំនាស់ក្នុងសំណុំរឿងគ្រោះថ្នាក់ចរាចរណ៍នោះនៅឡើយទេ បើ់ទោះបីជាសមត្ថកិច្ចនៅព្រឹកនេះបានរកឃើញរថយន្តជនសង្ស័យដែលប្លុងចោលនៅសង្កាត់ពង្សាំង ខណ្ឌព្រែកព្នៅយ៉ាងណាក្តី ។
គួរបញ្ជាក់ថា បុរសម្នាក់ដែលគេស្គាល់ថាបម្រើការងារនៅការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ គឺលោករ៉េត ស៊ីនេត អាយុ៤០ឆ្នាំ ជានាយរងការិយាល័យព្រហ្មទណ្ឌស្រាល បានបាត់បង់ជីវិតក្រោយ ត្រូវខ្មាន់កាំភ្លើងបាញ់ជាច្រើនគ្រាប់ ខណៈកំពុងជជែកដោះស្រាយគ្នាក្នុងរឿងគ្រោះថ្នាក់ចរាចណ៍។
ហេតុការណ៍ដែលមិនគួរកើតឡើងនៅក្នុងប្រទេសដែលពលរដ្ឋធ្លាប់មានវប្បធ៌មចេះយោគយល់អធ្យាស្រ័យ អត់ឱនឲ្យគ្នា និង មានអារ្យធ៌មដ៍រុងរឿងក្នុងតំបន់និងពិភពលោកនេះ បានកើតឡើងកាលពីយប់រំលងអធ្រាត្រឈានចូលថ្ងៃទី៣០ ធ្នូ ២០២០ នៅតាមបណ្តោយមហាវិថីសហព័ន្ឋរុស្ស៊ី ទល់មុខអាកាសយាន្តដ្ឋានអន្តរជាតិភ្នំពេញ ស្ថិតក្នុងភូមិក្បាលដំរីទី២ សង្កាត់កាកាបទី២ ខណ្ឌពោធិ៍សែនជ័យ ។
បើតាមសមត្ថកិច្ច ជនរងគ្រោះ បើករថយន្តម៉ាក FORD ពណ៌ ស ពាក់ស្លាកលេខភ្នំពេញ 2BD-3738 តាមមហាវិថីហសព័ន្ធរុស្ស៊ី ក្នុងទិសដៅពីកើតទៅលិច ។ ខណៈមកដល់ចំណុចកើតហេតុ ស្រាប់តែមានរថយន្តឡិចស៊ីស ពណ៌ខ្មៅមួយគ្រឿង បើកមកបុកពីក្រោយរថយន្តជនរងគ្រោះបណ្តាលឲ្យរងការខូចខាតបន្តិចបន្តួច ។ សេចក្តីរាយការណ៍បានបន្តថា ក្រោយកើតហេតុ ភាគីទាំងសងខាងបានឈប់និងបើករថយន្តមកចិញ្ចើមផ្លូវដើម្បីចរចាគ្នា ក្នុងនោះភាគីទាំងពីរបានសម្រួលគ្នា ដោយគ្រាន់តែអោយភាគីបង្កយករថយន្តទៅជួសជុលដើម្បីបញ្ចប់រឿងប៉ុណ្ណោះ ។
ស្រាប់តែម្ចាស់រថយន្តបង្កឡើងទៅលើរថយន្ត ចំណែកបក្ខពួក២នាក់ទៀត បានដកកាំភ្លើងមិនចាំម៉ាក បាញ់ប្រហារទៅលើជនរងគ្រោះជាច្រើនគ្រាប់ រួចបានបើករថយន្តរត់គេចខ្លួនបាត់ស្រមោល ។
ក្រុមអ្នកតាមដានសង្គមមួយចំនួនបានលើកឡើងថា បើពិនិត្យទៅលើសាច់រឿងដែលជាដើមចមឈានទៅជាអំពើឃាតកម្ម គឺដូចជាមិនទំនងទាល់តែសោះ ព្រោះគ្រាន់តែរឿងបែកស្តុបរថយន្តនិងខូចខាតរថយន្តបន្តិចបន្តួចឈានទៅបាញ់សម្លាប់មនុស្ស ឬករណីនេះជាការរៀបចំដើម្បីសម្លាប់ជនរងគ្រោះក្នុងរឿងអ្វីមួយ ?។
យ៉ាងណា គេសង្ឃឹមថា សមត្ថកិច្ចនឹងចាប់ជនដៃដល់និងបក្ខពួកមកផ្តន្ទាទោស ហើយនឹងដឹងថា ករណីខាងលើជាករណីគ្រោះថ្នាក់ចរាចរណ៍បង្កជារឿងឃាតកម្ម ឬ ជាករណីឃាតកម្មគិតទុកជាមុន ? ៕
