សំណុំរឿងបាត់ស្បែកជើង ធ្វើឲ្យលោកផ្កាយ១ ហេង គាហុង ទប់អារម្មណ៍មិនបានឈានទៅប្រើហិង្សាយកកាំភ្លើងវាយក្បាលសន្តិសុខបែកក្បាលហូរឈាមសន្លប់ នៅមិនទាន់ស្ងប់នៅឡើយទេ ខណៈលោកឧត្តមសេនីយ៍ត្រី ម្ចាស់គ្លីនិក សុខ ម៉េង កំពុងស្ថិតនៅក្នុងសាលាដំបូងខេត្តកណ្តាល ដើម្បីឲ្យតំណាងអយ្យការចោទសួរនិងចោទប្រកាន់នោះ បែរជាលេចរឿងមួយករណីទៀតនោះ គឺ លោកផ្កាយ២ ឈ្មោះសូរ វិចិត្រ ព្រមទាំងគូកន បានរងការចោទប្រកាន់ថាប្រើអំណាចរំលោភយកដីស្រះវត្ត ដែលមានទទឹង៣ម៉ែត្រ និងបណ្តោយ៤៥ម៉ែត្រ ដោយគ្មានខ្លាចបាប ចុះនរកបន្តិចនោះឡើយ ។
បើតាម KBN NEWS បានឲ្យដឹងទៀតថា ដីស្រះវត្ត ដែលមានទទឹង៣ម៉ែត្រ និងបណ្តោយ៤៥ម៉ែត្រ ដែលលោកផ្កាយ២ ឈ្មោះសូរ វិចិត្រ ប្រើអំណាចរបស់ខ្លួនរំលោភយកនោះ ស្ថិតនៅភូមិកោះចិន ឃុំកោះចិនស្រុកពញាឮ ខេត្តកណ្តាល ។
បើតាមព្រះគ្រូចៅអធិការវត្តមុន្នីសាគរ ហៅវត្តកោះចិន មានសង្ឃដីកាបញ្ជាក់ថា ដីស្រះនេះ គឺជាដីរបស់វត្តយ៉ាងពិតប្រាកដ មានប្រជាពលរដ្ឋចំណុះជើងវត្ត បានដឹងឮ និងព្រមធ្វើសាក្សី ព្រមទាំងមានការផ្ដិតមេដៃគាំទ្រ រហូតទៅដល់ជិត២០០គ្រួសារ ។
ព្រះគ្រូចៅអធិការវត្ត ព្រមទាំងប្រជាពលរដ្ឋចំណុះជើងវត្ត សំណូមពរ ដល់លោកនាយករដ្ឋមន្ត្រី ហ៊ុន សែន ជួយអន្តរាគមន៍ និងរកយុត្តិធម៌ឱ្យព្រះគ្រូចៅអធិការវត្តមុន្នីសាគរនោះផងដែរ ។
យ៉ាងណានៅរសៀលថ្ងៃទី០៥ មករា ២០២១នេះ «អង្រុត» មិនអាចរកការសុំអត្ថាធិប្បាយតបបានទេពីលោកផ្កាយ២ សូរ វិចិត្រ ជុំវិញការចោទប្រកាន់ខាងលើនេះ ។
ដោយឡែក ព័ត៌មានចុងក្រោយពីតុលាការខេត្តកណ្តាលបានឲ្យដឹងថា សំណុំរឿងលោកផ្កាយ១ ឈ្មោះហេង គាហុង បម្រើការងារនៅអយ្យការយោធា ដែលយកកាំភ្លើងអាម៉េបញ្ចូលគ្រាប់ និងវាយទៅជនរងគ្រោះឈ្មោះ ច្រឹក ស៊ីណា ភេទប្រុស អាយុ៣០ឆ្នាំ ជនជាតិខ្មែរ មុខរបរសន្តិសុខ ឱ្យហូរឈាម រហូតដួលសន្លប់កាលពីម៉ោងជាង១២ថ្ងៃត្រង់ម្សិលមិញនៅចំណុចភូមិអង្គស្នួលទី៣ ឃុំពើក ស្រុកអង្គស្នួល ខេត្តកណ្តាលនោះ ឥឡូវមានអ្នករត់ការដោះលែងហើយ ។ យ៉ាងណា រង់ចាំតាមដានទាំងអស់គ្នាថាតើតំណាងអយ្យការចោទប្រកាន់លោក ហេង គាហុង ពីបទអ្វី និង ត្រូវបញ្ជូនទៅឃុំនៅពន្ឋនាគារឬយ៉ាងណា ដែលអាចនឹងដឹងនៅពេលល្ងាចនេះ ៕
