ការពិតករណីបាញ់សម្លាប់លោក ឱម រដ្ឋសាឌី ជាអំពើប្លន់យកទូរសព្ទ

ទីបំផុត​ទៅ​សំណុំរឿង​បាញ់​សម្លាប់​លោក ឱម រដ្ឋ​សា​ឌី អតីតមន្ត្រី​ជាន់ខ្ពស់​គណបក្ស​ហ្វ៊ុ​ន​ស៊ិ​ន​ប៉ិច និង ជាទី​ប្រឹក្សា​ផ្ទាល់​របស់​សម្តេចក្រុមព្រះ នរោត្តម​រណ​ប្ញ​ទ្ឋិ ព្រះប្រធាន​គណបក្ស​ហ្វ៊ុ​ន​ស៊ិ​ន​ប៉ិច​កាលពី​១៨​ឆ្នាំ​មុន​នោះ គឺជា​ករណី​បាញ់​ប្លន់​យក​ទូរ​សព្ទ​ដៃ​ម៉ាក​ណូ​គា ៩២០០ (Nokia 9200) ។​

​នេះ​បើ​យោង​តាម​ព័ត៌មាន​ប៉ុន្មាន​ថ្ងៃនេះ​និង​ត្រូវ​បាន​គេ​ចែក​ផ្សាយ​បន្ត​គ្នា​នៅ​លើ​បណ្តាញ​ស​ង្គ​មហ្វេ​ស​ប៊ុ​ក ។​

​បើ​តាម​ព័ត៌មាន​ដែល​គេ​អះអាង​ថា​ចេញ​មក​ពី​សមត្ថកិច្ច​នោះ គឺ​ជនសង្ស័យ​ដែល​បាញ់​សម្លាប់​លោក ឱម រដ្ឋ​សា​ឌី ឈ្មោះ អ៊ា ណា​រ៉េ​ន ហៅ រិ​ន ផា​ន់ អាយុ​៣៨​ឆ្នាំ អតីត​ទាហាន​កុម្ម៉ង់ដូ ស្នាក់​នៅផ្ទះ​លេខ ៥៨ អ៉ឺ​១ ផ្លូវ​លេខ​១១០ ភូមិ​១៦ សង្កាត់​ផ្សារ​កណ្ដាល​១ ខណ្ឌ ដូនពេញ និង​ជា​ជន​ដៃដល់​ដែល​បាញ់​សម្លាប់​ប៉ូលិស​ព្រហ្មទណ្ឌ​កម្រិត​ស្រាល​នៃ​ស្នងការដ្ឋាន​នគរបាល​រាជធានី​ភ្នំពេញ​ដែល​ផ្តើម​ចេញពី​ករណី​គ្រោះថ្នាក់​ចរាចរណ៍​កាលពី​រំលង​អធ្រាត្រ​ថ្ងៃ​ទី​៣០ ធ្នូ ២០២០​។​

​គួរ​រំ​ឮ​កថា លោក ឱម រដ្ឋ​សា​ឌី ត្រូវ​បាន​ខ្មាន់​កាំំ​ភ្លើង​បាញ់​សម្លាប់​កាលពី​ដើម​ឆ្នាំ​២០០៣ នៅ​ចំណុច​ជិត​ផ្សារ​កាប់​គោ សង្កាត់​ទន្លេបាសាក់ ខណ្ឌចំការមន​។ ភ្លាម​ៗ ក្រោយ​លោក ឱម រដ្ឋ​សា​ឌី ស្លាប់ មាន​មជ្ឈដ្ឋាន​មួយ​ចំនួន​តូច​ដាក់​ការ​សង្ស័យ​ថា​ជា​ករណី​ឃាតកម្ម​នយោបាយ ។​

​គិត​ត្រឹម​ម៉ោង​១១​និង​០៨​នាទី​ថ្ងៃត្រង់ ថ្ងៃ​ទី​០៨ មក​រា ២០២១​នេះ ជន​ដៃដល់​បាញ់​សម្លាប់ លោក ឱម រដ្ឋ​សា​ឌី និង​លោក​រ៉េ​ត ស៊ី​ណែ​ត អាយុ​៤១​ឆ្នាំ ស្នាក់​នៅផ្ទះ​លេខ​១៦៩ ផ្លូវ​១៦៩ ភូមិ​៤ សង្កាត់​វាលវង់ ខណ្ឌ​៧​មក​រា រាជធានី​ភ្នំពេញ ជា​នាយ​រង​ការិយាល័យ​នគរបាល​កំរិត​ស្រាល នៃ​ស្នងការដ្ឋាន​នគរបាល​រាជធានី មិន​ទាន់​ត្រូវ​បាន​សមត្ថកិច្ច​ចាប់ខ្លួន​បាន​នៅឡើយ​ទេ ខណៈ​ជន​នេះ ត្រូវ​គេ​អះអាង​ថា​កំពុង​រត់គេច​ខ្លួន ពួន​ក្នុង​ព្រៃ​ព្រំប្រទល់​ខេត្តស្ទឹងត្រែង​និង​រតនគិរី ខណៈបក្ខពួកជាអ្នកបើកបររថយន្តឈ្មោះ កែ ចាន់មាន ត្រូវបានតំណាងអយ្យការ​ចោទ​ប្រកាន់ផ្លូវនៅព្រឹកថ្ងៃទី០៨ មករា ២០២១នេះ ពីបទ«សមគំនិតក្នុងអំពើឃាតកម្ម និងជួញដូរគ្រឿង​ញៀន និងបានបញ្ជូនបន្តទៅចៅក្រមស៊ើបសួរដើម្បីសម្រេចឃុំ ឬមិនឃុំខ្លួន៕