អ្នកធំមួយចំនួនកំពុងចាក់ដីរំលោភយកឆ្នេរសមុទ្រព្រែកត្រែង អាជ្ញាធរថាចាំសុំយោបល់មេៗ

ប្រជាពលរដ្ឋ បាន​លើក​ឡើង​ថាៈ នៅ​តាម​បណ្ដោយ​ឆ្នេរសមុទ្រ ព្រែក​ត្រែង ស្ថិត​ក្នុង​ឃុំ​អូរ​ត្រេះ ស្រុក​ស្ទឹង​ហាវ កំពុង​រង​នូវ​ការ​រំលោភ​បំពាន យ៉ាងធ្ងន់ធ្ងរ ដោយ​មានការ​ហ៊ុម​ព័ទ្ធ​ជា​របង​ថ្ម រឹង​មាំ​ធំ​ៗ និង​ចាក់​ដី​ចូល​សមុទ្រ យ៉ាង​អនាធិបតេយ្យ ចាប់ពី​រោងចក្រ​ប្រេងកាត មក​ដល់​ស្ពាន​ព្រែក​ត្រែង​។​

​ប្រភព​ដដែល បាន​បន្ត​ថាៈ សកម្មភាព​រំលោភ​បំពាន​នេះ បាន​បង្ក​ឡើង ដោយ​បុគ្គល​មាន​អំណាច ធំ​ៗ​ជា​ច្រើន​រូប ក្នុង​នោះ ក៏​មាន​អភិបាលរង ខេត្ត​ព្រះ​សីហ​នុ​មួយ រូប​ផង​ដែរ​។ ប្រជាពលរដ្ឋ ឆ្ងល់​ថា ហេតុ​អ្វី​ដី​សាធារណៈ​របស់​រដ្ឋ ដែល​ម្ខាង​ជា​ដី​ចំណី​ផ្លូវ និង​ម្ខាង​ទៀត ជា​ដី​ចំណី​សមុទ្រ បែរ​ទៅ​ជា​គេ​នាំ​គ្នា ទៅ​ហ៊ុម​ព័ទ្ធ​របង យក ធ្វើ​ដី​ជា​កម្មសិទ្ធិឯកជន​ទៅ​វិញ​។​

​លោក ហាក់ ម៉េ​ង មេឃុំ​អូរ​ត្រេះ ស្រុក​ស្ទឹង​ហាវ បាន​ប្រាប់​សារព័ត៌មាន តាម​ទូរស័ព្ទ​ថាៈ តំបន់​ហ្នឹង ខ្លះ​មាន​ប័ណ្ណកម្មសិទ្ធិ ខ្លះ​អត់​មាន​ទេ ហើយ​ឥឡូវ បើ​តាម​លោក អភិបាល និយាយ​ថា តំបន់​នេះ ចង់កា​ត់ទៅ​ឲ្យ​សង្កាត់​លេខ​១ គ្រប់គ្រង​វិញ​ហើយ​។​

​លោក ហាក់ វី​យ៉ា ប្រធាន​ភូមិបាល ស្រុក​ស្ទឹង​ហាវ បាន​មាន​ប្រសាសន៍​ប្រាប់ នៅ​រសៀល ថ្ងៃ​ទី​៤ ខែមករា​ថាៈ ដី​តាម​បណ្ដោយ​ឆ្នេរ​ហ្នឹង មិន​មាន​ប័ណ្ណ​នោះ​ទេ មាន​តែ​កន្លែង​ដាក់​ខ្សាច់​ហ្នឹង ទើប​មាន​ប័ណ្ណ​ប្រហែលជា ២​ប័ណ្ណ​ប៉ុណ្ណោះ​ទេ ក្រោយមក គឺ​គេ​ឈប់​ចេញ​ឲ្យ​ទៀត​ហើយ​។​

​ចំណែក​លោក ឆាយ សុគន្ធ​ដា អភិបាលស្រុក​ស្ទឹង​ហាវ ក៏​បាន​បញ្ជាក់​ប្រាប់​ផង​ដែរ​ថាៈ កន្លែង​ខ្លះ មាន​ប័ណ្ណកម្មសិទ្ធិ ប៉ុន្តែ​កន្លែង​ខ្លះ​ទៀត គឺ​អត់​មាន​ទេ​។ កន្លែង​ដែល​មាន ពី​មុនគេ ឲ្យ​ក្រុមប្រឹក្សា​សង្កាត់ ធ្វើ​អី​ៗ​នៅ​ទីនោះ ក្រោយមក ក៏​ទុក​ចោល​អ៊ីចឹង​ទៅ ពិសេស​មាន​ប័ណ្ណ នៅ​តែ​តំបន់​ពយ​ៗ​ទេ​។​

​បញ្ហា​នេះ លោក អ៊ី ធា​រិ​ន្ទ នាយក​ទីចាត់ការ​អន្តរ​វិស័យ សាលាខេត្ត​ព្រះ​សីហ​នុ បាន​ប្រាប់​សារព័ត៌មាន នៅ​ព្រឹក​ថ្ងៃ​ទី​៥ ខែមករា​នេះ​ថាៈ លោក អរគុណ សម្រាប់​ព័ត៌មាន​នេះ លោក​នឹង​រាយការណ៍ ជូន​ថ្នាក់ដឹកនាំ ដើម្បី​សុំ​មតិ​ដឹកនាំ​។​

​ជុំវិញ​ដី​ឆ្នេរ​សាធារណៈ​របស់​រដ្ឋ គឺ​បាន​គ្រប់គ្រង ដោយ​រដ្ឋបាល​ខេត្ត និង​គណៈកម្មការ​ឆ្នេរ ចំពោះ​វិធានការ​បែប​ណា​នោះ មហាជន ក៏​ដូច​ជា ប្រជាពលរដ្ឋ កំពុង រង់ចាំ​មើល​ការ​អនុវត្ត របស់​ថ្នាក់ដឹកនាំ​៕

ប្រភព ៖ Rasmei Kampuchea Daily