WHO ៖ លោក Tedros Adhanom Ghebreyesus ប្រមុខអង្គការសុខភាពពិភពលោក បាននិយាយ កាលពីថ្ងៃចន្ទ ទី១១ ខែមករា ឆ្នាំ២០២១ថា វីរុសកូរ៉ូណា បំប្លែងខ្លួនថ្មីដែលនៅតែបន្តឆ្លងរាលដាល គឺមានបញ្ហាខ្ពស់ ហើយអាចបណ្ដាលឲ្យមានករណីឆ្លងបន្ថែមទៀត និងចំនួនអ្នកជំងឺចូលសម្រាកនៅមន្ទីរពេទ្យកាន់តែច្រើនទៀត ប្រសិនបើការរីករាលដាលនៃវីរុសនេះ មិនត្រូវបានបង្ក្រាបភ្លាមៗទេនោះ ។
ប្រមុខអង្គការសុខភាពពិភពលោក បាននិយាយនៅក្នុងសន្និសីទសារព័ត៌មាន មួយអោយដឹងថា ទីភ្នាក់ងារសុខភាពពិភពលោក ត្រូវបានគេជូនដំណឹងកាលពីចុងសប្ដាហ៍អំពីវីរុស Covid-19 បំប្លែងខ្លួនថ្មីមួយ ត្រូវបានរកឃើញក្នុងប្រទេសជប៉ុន ។
កាលពីថ្ងៃអាទិត្យ វិទ្យាស្ថានជាតិជំងឺឆ្លងរបស់ជប៉ុន បាននិយាយថា ខ្លួនបានរកឃើញវីរុសកូរ៉ូណាបំប្លែងខ្លួនថ្មី លើអ្នកដំណើរ ៤នាក់ ដែលធ្វើដំណើរមកពីប្រទេសប្រេស៊ីល ។ វិទ្យាស្ថាននេះ បានបន្តថា វីរុសបំប្លែងខ្លួនថ្មីនេះ ទំនងជាមានការវិវត្តន៍ខ្លះ ដូចគ្នានឹងវីរុសបំប្លែងខ្លួនដទៃទៀត ដែលត្រូវបានរកឃើញនៅចក្រភពអង់គ្លេស និងអាហ្វ្រិកខាងត្បូង ។ មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក បាននិយាយកាលពីថ្ងៃសុក្រសប្ដាហ៍មុនថា នៅក្នុងសហរដ្ឋអាមេរិកនៅពេលនេះមានករណីឆ្លងជំងឺ COVID-19 បំប្លែងខ្លួនប្រភេទថ្មី យ៉ាងហោចណាស់ ៦៣នាក់ ៕
