គ្រូបង្វឹក​ឆត្រយោង​៩១១​ម្នាក់បាត់បង់ជីវិត ​ក្នុង​ហេតុការណ៍​លោត​ឆត្រយោង ព្រឹកមិញនេះ

រាជធានី​ភ្នំពេញ ៖ លោក​វរសេនីយ៍ត្រី លឹ​ម សាយ ជា​គ្រូបង្វឹក​ឆត្រយោង​ម្នាក់ បម្រើ​ការងារ នៅ​ក្នុង​បញ្ជាការដ្ឋាន​កងទ័ព​ពិសេស​៩១១ បាន​ជួបនឹង​គ្រោះថ្នាក់​លោត​ឆត្រយោង​ខុស​បច្ចេកទេស រហូត​ដល់​បាត់​បង់ជីវិត កាលពី​ព្រឹក​ថ្ងៃ​ទី​១៤ ខែមករា ឆ្នាំ​២០២១ នៅ​លើ​ទឹកដី​ស្រុក​ឱ​រាល់ ខេត្តកំពង់ស្ពឺ ។

បើ​តាម​ប្រភព​ពី​មន្ដ្រី​យោធា​ត្រ​ម្នាក់ បាន​ប្រាប់​ព័ត៌មាន​បឋម ដោយ​ត្រួស​ៗ​ថា ជន​រង​គ្រោះ ឈ្មោះ លឹ​ម សាយ មាន​ឋានន្ដរស័ក្ដិ​ជា​វរសេនីយ៍ត្រី និង​មាន​តួនាទី​ជា​គ្រូបង្វឹក​ឆត្រយោង ហើយ​លោកគ្រូ​បាន​ស្លាប់ ខណៈ​កំពុង​បង្វឹក​ទាហាន​ឆត្រយោង​។ រីឯ​មន្ដ្រី​យោធា​ឆត្រយោង​ម្នាក់​ទៀត ដែល​រង​របួសធ្ងន់​ដែរ​នោះ នៅ​មិន​ទាន់​ស្គាល់​អត្ដសញ្ញាណ​នៅឡើយ​។

ប្រភព​ព័ត៌មាន​ដដែល បាន​បន្ដ​ថា គ្រោះថ្នាក់​អកុសល​នេះ បាន​កើតឡើង ខណៈ​លោកគ្រូ​កំពុង​តែ​បង្វឹក​សិស្ស​ជាម​ន្ដ្រី​ទាហាន​ឆត្រយោង លោត​ពី​យន្ដហោះ​។ ប៉ុន្ដែ​នៅ​ពេល​លោកគ្រូ​លោត​ចុះ​មក ឆត្រ​បាន​គ្រលាស់​ជា​ធម្មតា តែ​ឆត្រ​របស់​លោកគ្រូ លឹ​ម សាយ បាន​វណ្ឌ​គ្នា​ជាមួយនឹង​សិស្ស​ម្នាក់​ទៀត បណ្ដាល​ឲ្យ​ធ្លាក់​មក​ដល់​ដី រង​របួសធ្ងន់​ទាំង​២​នាក់ តែ​ជា​អកុសល លោកគ្រូ លឹ​ម សាយ បាន​ស្លាប់ ខណៈ​បញ្ជូន​ទៅ​ដល់​មន្ទីរពេទ្យ ៕