ពូ​ម៉ូតូឌុប និង​​កង់​៣ ចំនួន​១៣​នាក់ ត្រូវ​ឃាត់ខ្លួន​អប់រំ​រឿង​បន្ទោបង់​តាម​ទី​សារ​ធា​ណៈ

រាជធានី​ភ្នំពេញ ៖ នា​ព្រឹក​ថ្ងៃ​ទី​១៩ មក​រា ២០២១​នេះ រដ្ឋបាល​ខណ្ឌ​បាន បាន​ឃាត់ខ្លួន​អ្នក​មក​បន្ទោបង់​នៅ​តាម​សួនច្បារ​សាធារណៈ តាម​ដើម​ឈា និង​ទីតាំង​សាធារណៈ​ផ្សេង​ៗ​ទៀត បាន​ចំនួន ១៣​នាក់ នាំ​យក​មក​អប់រំ​ណែនាំ នៅ​សាលា​ខណ្ឌដូនពេញ ។

លោក សុខ ពេញ​វុ​ធ អភិបាល​នៃ​គណៈ អភិបាល​ខណ្ឌដូនពេញ បាន​ចាត់​អោយ​កម្លាំង​ប្រជា​ការពារ​ខណ្ឌដូនពេញ បន្ត​ចុះ​ធ្វើ​សណ្ដាប់ធ្នាប់ ក្នុង​មូលដ្ឋាន ក៏​បាន​ជួប ក្រុម​ម៉ូតូឌុប និង​ម៉ូតូ​កង់​៣ ចំនួន​១៣​នាក់ បាន​ឈប់​យាន្ត​ជំនះ​របស់​ខ្លួន ហើយ​ទៅ​បន្ទោបង់ នៅ​តាម​ដើមឈើ តាម​សួនច្បារ តាម​ទី​សាធារណៈ ដែល​ធ្វើ​ឲ្យ​បាត់បង់​សណ្តាប់ធ្នាប់ របៀបរៀបរយ និង​បង្ក​អោយ​មាន​ក្លិនឆ្អេះ​ឆ្អាប​ដល់​អ្នក​ធ្វើ​ដំណើរ​។​ល​។ ភ្លាម​ៗ​នោះ កម្លាំង​ណ្ឌ​ដូនពេញ​ក៏​បាន​អញ្ជើញ​ពួក​គាត់​មក​ធ្វើការ​អប់រំ​ណែនាំ នៅ​សាលា​ខណ្ឌដូនពេញ និង​បាន​ឲ្យ​ពួក​គាត់​ធ្វើការ​បាញ់​លាង​សម្អាត​កន្លែង ដែល​ពួក​គាត់​បន្ទោបង់​រួច ទើប​អនុញ្ញាត​អោយ​ពួក​គាត់​ត្រឡប់​ទៅ​វិញ ។

រដ្ឋបាល​ខណ្ឌ សូម​សំណូមពរ​ដល់​បងប្អូន​ប្រជាពលរដ្ឋ​ទាំងអស់ សូមកុំ​យក​គំរូ​តាម​ពួក​គាត់ និង​សូម​រក​កន្លែង​បន្ទោបង់​អោយ​បាន​ត្រឹមត្រូវ នៅ​បន្ទប់ទឹក​សាធារណៈ ឬ​ឯកជន ដែល​នៅ​ជិត​លោក​អ្នក ជៀសវាង​ធ្វើ​តាម​ពួក​គាត់ បង្ក​ភាព​អនាធិបតេយ្យ បាត់​សណ្តាប់ធ្នាប់ អនាម័យ និង​ប៉ះពាល់​ដល់​សុខភាព​សាធារណជន​ផង​ដែរ សូម​អរគុណ ៕